Monday, July 22, 2013

ဆရာမင်းလူ နေပြန်ကောင်းပါစေ


ဆရာမင်းလူ နေပြန်ကောင်းပါစေ
ဂျူနီယာဝင်း၊ ဇူလိုင် ၂၃၊ ၂၀၁၃
ကျွန်မကဆရာ့ရဲ့ပရိသတ်ပါ.။ ဆရာရေးတဲ့ အချစ်ဝတ္တုတွေနဲ့ တက္ကသိုလ်တက်ခဲ့။ ဆရာ့ရဲ့လှပသိမ်မွေ့တဲ့ စာသားတွေနဲ့ ကျူတိုရီရယ်ဖြေ။ ဆရာ့ဝတ္တုခေါင်းစဉ်တွေနဲ့ စိတ်ကူးယဉ်ပြီး ဆရာ့ပုံသဏ္ဍန်ကို ပုံဖော်ရင်း ကြီးပြင်းခဲ့ရပါတယ်။
ကျွန်မအကို မောင်ရစ်ရဲ့ အသည်းစွဲစာရေးဆရာလည်းဖြစ်တာမို့ သူဝယ်တဲ့မင်းလူစာအုပ်တွေအကုန် ကျွန်မကလိုက်ဖတ်ရင်း ဆရာ့စာတွေ အရေးအသားတွေ သဘောကျခဲ့ပုံ ရပါတယ်ဆရာ။ ဆရာ့အဖေ ဦးသာဓုက ကျွန်မအဘိုးအဘွားများရဲ့ မိတ်ဆွေရင်းချာလိုဖြစ်၊ မိခင်အမေညိုက မေမေကြီးဒေါ်ခင်မျိူးချစ်ရဲ့ သူငယ်ချင်းအရင်းတွေမို့ပဲလား။ ကျွန်မအကိုက တခါတော့ သူ ဘဘကြီးတို့နဲ့ သာဓုခြံရောက်ရင်းနဲ့ ထင်ပါရဲ့။ ဆရာ့ကို မြင်ဖူးသွားလေတယ်။ သူ့မှာ ၀မ်းသာအားရနဲ့ ကျွန်မကိုကြွှားသေး။ ကျွန်မက ဘယ်လိုပုံလဲနဲ့ စိတ်ဝင်တစားမေးတာတော့ မဖြေပါဘူး။ ကျွန်မက ဆရာမင်းလူက ဘယ်သူနဲ့တူသလဲ (ဘယ်မင်းသားနဲ့ တူလဲ ဆိုတဲ့အဓိပ္ပါယ်) ဆိုတော့ စာရေးဆရာက စာရေးဆရာနဲ့ တူတာပေါ့ … ဟဲ့ … တဲ့။
ဆရာ့ကို စတွေ့ဖူးတာ ဦးသုမောင် ကွယ်လွန်စဉ်ကပါ။ နှစ်ထောင့်တစ်ဆယ်လောက်က ထင်တယ်။ အဲသည်နေ့က ဆရာတို့သာဓုခြံကို ပထမဦးဆုံး ရောက်ခဲ့ဖူးပါတယ်ဆရာ။ ဦးသုမောင်ရဲ့ သာဓုခြံမိသားစုအကြောင်းတွေကို ဖတ်ရင်းနဲ့ သာဓုခြံဆိုတာကို ရင်းနှီးနေခဲ့ရပါတယ်။ ဆရာဦးသုမောင်မိသားစုနဲ့ နှူတ်ဆက်အပြီးမှာ ဆရာမင်းလူတို့ရှိတယ်ဆိုတဲ့ လက်ဘက်ရည်ဆိုင်လေးကို ရောက်အောင်သွားခဲ့ပါတယ်။ ဆရာ့ကိုတွေ့ဖူးချင်လွန်းလို့ ရင်တွေတောင်ခုန်။ ဆရာရှိတဲ့ လက်ဘက်ရည်ဆိုင်လေးကို သွားပြီး ဆရာ့ကို တွေ့ဖြစ်ခဲ့ပါတယ်။ ဆရာတို့ရဲ့လက်ဖက်ရည်ဆိုင်လေးမှာ ဆရာနဲ့ အတူဓါတ်ပုံရိုက်ခွင့်ရတာ ကျွန်မအတွက် အိပ်မက်လိုပါဆရာ။
ဆရာနေမကောင်းဖူးဆိုတာ ကြားသိရတုန်းက မဟုတ်ပါစေနဲ့လို့ ဆုတောင်းမိပါတယ်။ ဆရာတို့မိသားစုလို ရိုးသားအေးချမ်း အေးဆေးတည်ညိမ်တဲ့ဘ၀မျိူးကို ပိုင်ဆိုင်ထားတဲ့ ဆရာတို့အားလုံးအတွက် ကျွန်မအလွန်ပဲ စိတ်မကောင်းဖြစ်ရပါတယ်။ ဆရာနေပြန်ကောင်းပြီး စာတွေပြန်ရေးနိုင်ပါစေလို့ ကျွန်မ တို့ မိသားစုအားလုံးက မေတ္တာများစွာဖြင့် ဆုတောင်းပေးနေပါတယ်ဆရာ။

Saturday, July 20, 2013

Unforgettable (2)

မမေ့နိုင်စရာများ (၂)
ဂျူနီယာဝင်း၊ ဇူလိုင် ၂၀၊ ၂၀၁၃
ဒီကနေ့က အာဇာနည်နေ့။ ကျွန်မအဘိုးအဘွားများ ပြောတဲ့နေ့
ငါတို့အာဇာနည်ခေါင်းဆောင်ကြီးများ ကျဆုံးကုန်တဲ့နေ့၊ အသတ်ခံရတဲ့နေ့။ အခုဒီကနေ့ အာဇာနည်နေ့ ရောက်လာပြန်ပြီ။
မနေ့က စဉ်းစားနေတာ … …
မိုးသားတွေက အဲဒီ၁၉၄၇တုန်းကလိုပဲပိန်းနေအောင်ရွာပေးမှာလား..
လေပြင်းတွေကရောအဲသည်နေ့တုန်းကလိုပဲကြမ်းတမ်းစွာတိုက်ခတ်ဖြစ်ဦးမလား…
ငါစဉ်းစားကြည့်တယ်…….
၁၉၄၇တုန်းက မျက်ရည်မိုးတွေ ကြွေခဲ့ကြတယ်ဆိုတဲ့ အဖြစ်တွေကို မတွေ့မြင်နိုင်တော့။  တတိုင်းပြည်လုံး တုန်လှူပ်ခြောက်ခြားခဲ့ကြတယ် ဆိုတဲ့ မျက်နှာတွေ မရှိနိုင်တော့။  အဲသည်နေ့တုန်းက ဆုံးရူံးမူကို ရင်နဲ့မမျှအောင် ခံစားကြရတဲ့ အသည်းနှလုံးဆိုတာကို ငါ့ရဲ့ရေခဲလိုနှလုံးသားက မခံစားတတ်လေတော့။
အကယ်၍များ …
မိုးသားတိမ်လိပ်တွေကပါ အဲသည်နေ့တုန်းကလိုမျိူး၊ သည်ကနေ့ကို မည်းနေအောင် မရွာပေးခဲ့ဘူးဆိုရင် …

ငါ့ရင်ထဲ အာဇာနည်နေ့ကို ဘယ်လိုများ လွမ်းရပါ့။

Friday, July 12, 2013

Book Review - Our County by U Khin Maung Latt (BA)

စာအုပ်ရီဗျူး - တို့တိုင်းပြည် ဦးခင်မောင်လတ်(ဘီအေ)
ဂျူနီယာဝင်း၊ ဇူလိုင် ၁၂၊ ၂၀၁၃
စာအုပ်အမည် - တို့တိုင်းပြည်
ရေးသူ - ဦးခင်မောင်လတ် ဘီအေ
ဦးဖိုး (မဟာဝိဇ္ဇာ)တည်းဖြတ်သည်
စိတ်ကူးချိူချိူ
ဒုတိယအကြိမ်
၂၀၁၃ ဇူလိုင်
တန်ဖိုး ၂၂၀၀ ကျပ်
အုပ်ရေ ၅၀၀
စာမျက်နှာ ၂၀၀
အခန်း ၇ ခန်း
စာအုပ်၏ထူးခြားချက်များ မူရင်းအတိုင်း ရုပ်ပုံကားချပ်များတင်ပြမူ၊ ရှေးဓါတ်ပုံဟောင်းများကို သပ်ရပ်စွာတင်ပြမူနှင့် မြန်မာပြည်မြေပုံများကို သပ်ရပ်သောအဖြူအမဲဖြင့်ဖော်ပြမူများ
မူရင်း ဘဘကြီးဦးခင်မောင်လတ် ပုံနှိတ်စာလုံးများနဲ့ “မျိူးခြားလက်အောက် ကျွန်သပေါက်“ ဆိုတဲ့စာမူထုတ်ကို ဘဘကြီးကွယ်လွန်သွားပြီးတော့မှ ရှာတွေ့ခဲ့တာကို ဖတ်ကြည့်ခဲ့ဖူးတယ်။ အလွန်ကြိုက်နှစ်သက်လွန်းလို့ ၂၀၀၇..၂၀၀၈ ခုနှစ်လောက်က ကျွန်မရဲ့ဘလော့မှာ တင်ပေးခဲ့ဖူးတယ်။ မြန်မာစာလည်း သေချမရိုက်တတ်တော့ ကိုယ့်မောင်နှမများကို ရိုက်ခိုင်းရ၊ ကိုယ်ကိုယ်တိုင်ရိုက်တော့လည်း ကြာပေမယ့် မရရရအောင် ကြိုးစားပြီး ရိုက်တင်ခဲ့ဖူးတာကို အမှတ်ရမိပါတယ်။ အဲသည်တုန်းက တ၀က်တပျက်နဲ့ ဆက်မတင်ဖြစ်ခဲ့တော့ဘူးတာကိုလည်း မှတ်မိတယ်။ ဘယ်သူကမှလည်း ကျွန်မကိုဘဘကြီးရဲ့ “တို့တိုင်းပြည်“က တ၀က်တပျက်နဲ့မို့ ဆက်တင်ပေးပါလို့ တောင်းဆိုတာလည်း မရှိတာကတကြောင်း ဆက်မတင်ဖြစ်ခဲ့ဖူးလေ။
အခုတော့ ဒါကိုစိတ်ကူးချိူချိူက မူရင်းစာအုပ်နဲ့အတူ အဲသည်အတိုင်း ထုတ်ဖြစ်ခဲ့တာမို့ ဒါဟာဝမ်းသာစရာကိစ္စလို့ ဆိုရမှာပါပဲ။ ဒါ့အပြင်ဘဘကြီးဦးခင်မောင်လတ်ကွယ်လွန်ခဲ့တဲ့ သြဂုတ်လ၁ရက်နေ့ကလည်း နီးလာပြီမို့လို့ ဘဘကြီးအတွက် အမှတ်တရ သတိရစရာဖြစ်လာရတယ်။ ဘဘကြီးက သြဂုတ်လမွေးသူမို့လည်း ဒီစာအုပ်လေးထွက်လာကို ဘဘကြီးအတွက် အမှတ်တရအဖြစ် မှတ်တမ်းတင်ရလိမ့်မယ်။
မာတိကာအရ အခန်း ၇ ခန်းလို့ဆိုထားတယ်။ “မျိူးခြားလက်အောက် ကျွန်သပေါက်“ က အခန်း ၄မှာ တွေ့ရတယ်။ အဲသည်ကနေ နောက်ပိုင်းကို ကျွန်မက ကောင်းကောင်း ဖတ်ဖူးထားပါတယ်။ ရှေ့ပိုင်း အခန်း၎ခန်းက ကျွန်မအတွက် အသစ်ပါ။ အခုလို Completeတွေ့ရ ဖတ်ရတာ ၀မ်းသာစရာပါပဲ။ ရှေ့က အခန်း၎ခန်းက ကျွန်မတို့မြန်မာပြည်… တို့တိုင်းပြည်အကြောင်း ပထ၀ီအနေအထားတွေကအစ၊ ရှေးအဆက်ဆက်အစဉ်အလာများကို ရေးသားထားပါတယ်။ မကြားရတာကြာပြီဖြစ်တဲ့ “ဘယ်မြေက စေတီပေါမလဲ“ ဟူ၍ နင်လား ငါလား ယှဉ်ပြိုင်ကြွားနိုင်သည့် ပြည်ထောင်စုမြန်မာနိုင်ငံတော်ဟု တွင်သော တို့တိုင်းပြည်“ ဟူသော အစဦးဆုံးစာလုံးကား ကျွန်မတို့စာဖတ်သူရင်ကို ထိမှန်သွားစေပါလိမ့်မည်။
တို့တိုင်းပြည်ရဲ့ ပထ၀ီအနေအထားတွေ၊ ထိစပ်နေတဲ့ရေမြေတောတောင်တွေ၊ ပြီးတော့တို့တိုင်းပြည်ထဲမှာ ပဲခူးရိုးမတောင်တဲ့၊ ဧရာဝတီမြစ်ဝကျွန်းပေါ်တဲ့၊ ရှမ်းကုန်းပြင်မြင့်နှင့် တနင်္သာရီတဲ့၊ တနင်္သာရီကမ်းရိုးတမ်းဒေသတဲ့၊ သားငှက်တိရစ္ဆာများရှိကြပုံများတဲ့၊ အပင်ငယ်လေးများအကြောင်းတဲ့၊ ငါးအမျိူးအစားများတဲ့၊ ပင်လယ်ကမ်းရိုးတမ်းတဲ့၊ မြစ်နားဝန်းကျင်ဒေသများတဲ့၊ အင်းအိုင်ချိူင့်ဝှမ်းများ၊ တောတောင်ထူထပ်သောဒေသများတဲ့၊ ပန်းမာန်များပေါများရာတဲ့.. အဲဒါ တို့တိုင်းပြည်ပါပဲကလားဟု ခံစားမိသွားရတာက ရှေ့ကအခန်း ၂ ခန်း ဖတ်ရင်းနဲ့ပါ။
အခန်း၃ဖြစ်တဲ့ “တိုင်းပြည်တည်ထောင်တို့ညီနောင်“ အခန်းမှာတော့ တို့တိုင်းရင်းသားများ ယဉ်ကျေးဖွယ်ရာအမူအရာရှိတဲ့ အခြားလူမျိူးများထက် နှစ်သက်ဖွယ်ရာကောင်းလို့ မှတ်ချက်ချခံကြရပုံများ၊ စေတနာသဒ္ဓါတရားထက်သန်ပုံ၊ စိတ်နေသဘောထားလိမ္မာကြပုံများကို ဖွဲ့ဆိုထားကာ ဇာတ်သဘင်အကအလှများ မြတ်နိုးတွယ်တာကြပုံတွေလည်း ရေးသားထားသည်။ အဲသည်အခန်းမှာပင် စစ်အတွင်းမြန်မာနိုင်ငံသားတို့ရဲ့ ဗမာ့ရန်သူများကို တိုက်ပွဲဝင်ခဲ့ပုံများတွင်တော့ သမိုင်းရာဇ၀င်အဆက်ဆက် အခြေအနေများကို စစ်မြေပြင်ဖြစ်ခဲ့လေတဲ့ ဟောသည်တို့တိုင်းပြည်တွင်း ကိစ္စရပ်များကို တွေ့ကြလေသည်။ သရေခေတ္တရာ၊ ပုဂံရှေးပြည်၊ ကုန်းဘောင်ပြည့်၊ နော်ရထာ ကျန်စစ် ဘုရင့်နောင် အစရှိတဲ့ ရှေးမင်းအဆက်ဆက်များ သမိုင်းအဖြစ်များ၊ ပထမ ဒုတိယ တတိယမြန်မာနိုင်ငံတော်၊ စစ်သူကြီးမဟာဗန္ဒုလ၊ မြ၀တီမင်းကြီးဦးစ အစ၇ှိသော ခေါင်းဆောင်မူ စွမ်းရည်စွမ်းပကားများ၊ ဘကြိးတော်၊ သာယာဝတီမင်း၊ မင်းတုန်းမင်း၊ ပုဂံမင်းတဲ့။ ထိုထိုသော ရာဇ၀င်ခင်းခဲ့လေသော တို့တိုင်းပြည်ကြီးအကြောင်းကို သမိုင်းနှင့်ယှဉ်ကာ ဖတ်ကြရပေအုံးမည်။
အခန်း၎ အခန်း၅ကတော့ မျိူးခြားလက်အောက် ကျွန်အဖြစ်ရောက်ခဲ့ရလေသော တို့တိုင်းပြည်ကနေ လွတ်လပ်ရေးကြိုးပမ်းမူများကို ရှေးဓါတ်ပုံဟောင်းများနှင့် စိတ်ဝင်စားဖွယ်ဖတ်ကြရပါသည်။ အခန်း ၆ တွင်တို့တိုင်းပြည်ဟာဖြင့် ရွှေပြည်ငွေပြည်ပါတဲ့ ဟု ခေါင်းစဉ်တပ်လျက် တကယ်ပဲ တို့တိုင်းပြည်ကြီးက ရှိတဲ့လူဦးရေနဲ့ မျှတယုံမက ပိုလျှံသော စိုက်ပျိူးသီးနှံများပေါများကြွယ်ဝပုံများကို အံ့သြဖွယ် ဖတ်ကြရလေသည်။ တိုင်းပြည်၏အကျယ်အ၀န်းအရပင် ကျွန်းထွက်တဲ့ တို့တိုင်းပြည်ပါတဲ့။ တို့တိုင်းပြည်၏ သစ်တောများပေါကြွယ်ဝပုံများကိုလည်း ပုံများ ရုပ်ပုံများဖြင့် ယှဉ်တွဲဖတ်ရူကြရပါသည်။ ထိုပြင်၁၉၂၄မှ ၃၉ ခုနှစ်ကြာ်း ကျွန်းအထွက်နှူန်း၊ အခွန်စာရင်း၊ အမြတ်ငွေများကို စာရင်းဇယားပုံများလည်း ပါလေသည်။ ပြည်သူလူထု ကျပ်ပြည့်တင်းပြည့် ခံစားရစေရန် သစ်တောများကို နိုင်ငံတော်က မည်သို့စီမံခန့်ခွဲပုံများကိုလည်း ဗဟုသုတဖြစ်ဖွယ် ဖတ်ရူကြရပါသည်။ ကျွန်းတင်မက ရေနံကလည်း ပြည့်ဖြိုးလိုက်တာမှတဲ့။ ထို့ပြင်နိုင်ငံတကာမှ တင်သွင်းသောကုန်များကိုလည်း စိတ်ဝင်စားဖွယ်တွေ့ကြရသည်။ ရေလမ်းကုန်း လမ်းဝေဟင်လမ်းများကား တို့တိုင်းပြည်သားတို့ ကူးသန်းသွားလာနေကြကုန်သော ခရီးသွားလာမှုများဖြစ်ကြောင်းကိုလည်း သိမြင်လာကြရပေတော့သည်။

နောက်ဆုံးအခန်းကတော့ တို့တိုင်းပြည်ဟာဖြင့် စိုက်ခင်းပျိူးခင်းတို့ဖြင့် စိမ်းလန်းစိုပြည်၊ သမင်ဒရယ်ချေငယ်စိုင်ဆတ်တို့ ပျော်ပါးရာ၊ တောတောင်ရေမြေတို့ဖြင့် သာယာလှစွာ၊ ရွှေတွင်းငွေတွင်း ပယင်းကျောက်မျက်ကြွယ်ဝရာ၊ ဤမြေဤတော အရာရာကား တို့တောတို့မြေတို့ ရတနာမြေ တို့ပိုင်တဲ့မြေ။ အဲဒါတို့တိုင်းပြည် တို့နိုင်ငံ။ တို့ပြည်သားတို့၏ မယှဉ်နိုင်သောသတ္တိထူး။ တို့နိုင်ငံသားတို့၏ လွတ်လတ်ရေးစိတ်ဓါတ်၊ တို့တိုင်းပြည်သားတို့ မိမိတို့အလိုအလျောက် အားရွှင်လန်းစွာ ခံယူတည်ဆောက်ကြလေသော ငါးပါးသီလ၊ ရှစ်ပါးသီလ၊ ရဟန်းသံယာတော်မြတ်တို့၏ နှစ်ရာ့နှစ်ဆယ်ခုနှစ်သွယ်သောသိက္ခာပုဒ်၊ ကျင့်ဝတ်သိက္ခာစောင့်ထိန်းမူ၊ သာသနာတော်ရေး လောကီရေး၊  နိုင်ငံရေး။ တရားဥပဒေအစရှိသော တို့တိုင်းပြည်သား တို့အကြောင်းများအပြင် တို့တိုင်းပြည်ဟာ တချိန်တခါမှာဖြင့် အခြားနိုင်ငံများနည်းတူ ပျက်စီးယိုယွင်းခြင်းတို့ တွေ့ကြုံခဲ့ရငြားလည်း သာသနာ၊ ယဉ်ကျေးမူ၊ ကိုယ်ကျင့်တရား၊ ပညာရေးအစရှိသော သိမ်မွေ့သော စိတ်တရားစုတို့ကို မဖောက်မပြန်စေရန်၊ မြတ်စွာဘုရား၏ အဆုံးအမ၊ အတွင်းစိတ်နူးညံ့မူ၊ ပညာဥာဏ်အလင်းရောင်တို့ ပြန်လည်ထွန်းပလာသောအခါ တို့တိုင်းပြည်သားတို့၏ ထက်မြတ်သော ကိုယ်ပိုင်ဥာဏ်သည် မီးခဲပြာဖုံးအဖြစ်မှ ထွန်းလင်းတောက်ပသော ဥာဏ်ပညာအမြော်အမြင်တို့ဖြင့် သင့်မြတ်သော ဂုဏ်အရည်အချင်းများ ပြည့်စုံလေသော လောကသစ်ကို တည်ဆောက်နိုင်ပါလိမ့်မည်ဟူ၍ စာအုပ်ကိုဖတ်ရင်း ခံစားမိလိုက်ရပါသည်။