ကိုယ်တိုင်ရေးပုံတူများ ရေးဆွဲခဲ့သူ ၈ျူနီယာ၀င်း

ကိုယ်တိုင်ရေးပုံတူများ ရေးဆွဲခဲ့သူ

Abrecht Durer (ဂျူရာ) (၁၄၇၁-၁၅၂၈) သည် ဂျာမန်လူမိုျး ပန်းချီဆရာတစ်ဦးဖြစ်ရုံမက သစ်သားထွင်းပုံနှိပ်ပန်းချီကားများကို လည်း ရေးဆွဲထွင်းတတ်သူဖြစ်ကာ သီအိုရီဆန်ဆန် စဉ်းစားတွေးခေါ်တတ်သူလည်း ဖြစ်ပါသည်။ ဖခင်ဖြစ်သူသည် ရွှေပန်းထိမ်ဆရာ တစ်ဦး ဖြစ်သည်။ သူ့ကို မေလ ၂၁ ရက်နေ့မှာ မွေးဖွားခဲ့ပြီး သားသမီး ၁၈ ယောက်ထဲတွင် သူက ဒုတိယမြောက်ဖြစ်လေသည်။ ဖခင်ဖြစ်သူ၏ ရွှေပန်းထိမ်အတတ်ပညာ၊ ပန်းချီပညာများအပြင် သူ၏ ခေါင်းကိုင်ဖခင်တစ်ဦးဖြစ်သူ Antonkoberger ၏ ပုံနှိပ်ထုတ်လုပ်ငန်းများတွင်လည်း ပါဝင် လုပ်ကိုင်နိုင်ခဲ့သူဖြစ်ပါသည်။

သူ့ဘဝအကိုျးပေးအတိုင်းပင် ငယ်ရွယ်စဉ်ကပင် ပုံနှိပ်လုပ်ငန်း၊ အက္ခရာထွင်းလုပ်ငန်းများတွင် ကျွမ်းကျင်ခဲ့သူဖြစ်လေသည်။ ထိုခေတ် က Nurenberg တွင် နာမည်ကျော်ပန်းချီဆရာ Michael Wolgemut ထံတွင် သူအသက် ၁၅ နှစ်အရွယ်ကစ၍ တပည့်ခံခဲ့သည်။ သူ၏ ပထမဦးဆုံးသော ကိုယ်တိုင်ရေးပုံတူမှာ ၁၄၈၄ ခုနှစ် သူ့အသက် ၁၃ နှစ်အရွယ်မှာ ရေးဆွဲသော ငွေရောင်မင်သုံးပန်းချီ ဖြစ်လေသည်။ နောက်ပိုင်းတွင် ယင်းကို 'ကျွန်တော် ကလေးဘဝတုန်းက'ဟု အမည်ပေးခဲ့ပါသည်။

ဂူျရာသည် ၁၄၉ဝ ပြည့်နှစ်နောက်ပိုင်းတွင် ကျောက်ထွင်းပန်းပု ထုပညာရှင် Martin Schongauer သို့ ပညာဆည်းပူးဖို့ ဥရောပ မြောက်ပိုင်းသို့ သွားခဲ့သည်။ သို့သော် သူ မရောက်မီ Martin ကွယ်လွန်ခဲ့ရာ Martin ၏ ညီအစ်ကိုများထံတွင် ဆက်လက် ပညာသင်ယူခဲ့ သည်။ ၁၄၉၃ ခုနှစ် သူ အသက် ၂၂ နှစ်အရွယ်တွင် ဆေးရောင်စုံဖြင့် ကိုယ်တိုင်ရေး ပုံတူဆေးရေးကို ရေးဆွဲခဲ့သည်။ 

ဂူျရာသည် ထိုမှ တစ်ဖန် အီတလီ၊ ဗင်းနစ်မြို့များမှသည်Nurenberg သို့ ပြန်ရောက်လာသည့် ကာလတစ်လျှောက်လုံးတွင် ပန်းချီကား များများစွာ ရေးဆွဲခဲ့ ကာ သစ်သားထွင်း လက်ရာများလည်း အများအပြား ရေးဆွဲခဲ့သည်။ သူရေးဆွဲသော လက်ရာများမှာ အထူးသဖြင့် လူ့ကိုယ်ခန္ဓာ ပုံပန်းများ သည် ထိုခေတ်က နာမည်ကျော်ပန်းချီဆရာများဖြစ်သည့် Lorenzo dei Credi, Mantegna တို့၏ သြဇာသက်ရောက်မှုများ လွှမ်းမိုးနေသည် ဟု ဆိုကြသည်။ ၁၄၉၁ ခုနှစ်မှာ ထပ်မံရေးဆွဲသော ပုံတူသည်လည်း လူသိများသော ပုံတူဖြစ်သည်။

၁၅ဝဝ ပြည့်နှစ် သူ့အသက် ၂၉ နှစ်ရွယ်တွင် ဂျူရာသည် ကိုယ်တိုင်ရေးပုံတူကို ထပ်မံရေးဆွဲခဲ့သည်။ 

ထိုပန်းချီကား ၃ ခုကို ယှဉ်ကြည့်ခြင်းဖြင့် သူ့ အသက်အရွယ်အလိုက် ပြောင်းလဲမှုကို တွေ့ကြရမည်ဖြစ်ပါသည်။ ဂျူရာ့အကြောင်းကို စဉ်းစားလိုက်လျှင် ထိုကိုယ် တိုင်ရေး ပုံတူပန်းချီကား ၃ ခု အပြင် သူ၏ အကောင်းဆုံးနှင့် နာမည် အကြီးဆုံး သစ်သားထွင်း ပုံနှိပ်ပန်းချီကားကို မေ့ထား၍ မရနိုင်ချေ။ 

၁၅၁၄ ခုနှစ်မှာ ရေးခဲ့သော ထို Melen-collia တွင် ထူးခြားသော Magic square (အံ့ဖွယ်စတုရန်း) (၄ x ၄ စတုရန်းကွက်) ပါဝင်နေပေ သည်။ ၄င်းသည် ပုံ၏လယ်ယာ အပေါ်ဘက်တွင် ထွင်းထားသည်။ အံ့ဖွယ်စတုရန်းဟူသည်ကား ၁.၂.၃.၄ ---၁၆ ထိ ပါဝင်သော ကိန်းဂဏန်း များကို စတုရန်းတွင် အတန်းလိုက်၊ ဒေါင်လိုက် ထောင့်ဖြတ်လိုက် ထည့်ထားရာ ပေါင်းလဒ်သည် အားလုံး ၃၄ ဖြစ်စေသော စတုရန်းကိုခေါ် သည်။ ၄င်းအံ့ဖွယ်စတုရန်းကို ရေးသားခဲ့သော ခုနှစ် ၁၅၁၄ သည် အောက်ဆုံးတန်းတွင် ပါဝင်သည်။ ၃ x ၃ အံ့ဖွယ်စတုရန်းများ ပေါ်လာပြီး နောက် ဂျူရာသည် ပထမဦးဆုံး ၄ x ၄ အံ့ဖွယ်စတုရန်းကို ရေးသားဖော်ထုတ်ခဲ့သူအဖြစ် အသိအမှတ်ပြုခဲ့ကြပါသည်။ ဂျူရာက ဘယ်လိုလုပ် ပြီး စဉ်းစားလိုက်သလဲဆိုတာကတော့ ပဟေဠိဖြစ်နေဆဲဖြစ်ပါသည်။

ဂျူရာ၏ အစွမ်းပြချက်များတွင် အထူးခြားဆုံးလက်ရာမှာ 'ဆံပင်' ရေးဆွဲခြင်းဖြစ်သည်။ ခေတ်ပြိုင်ပန်းချီဆရာများပင် သူ၏ ဆံပင်ရေးဆွဲသော စုတ်တံကို အထူးစိတ်ဝင်စားခဲ့ကြလေသည်။ ပန်းချီဆရာBellini က ဂျူရာ့ကို ''ခင်ဗျားဆံပင်ပုံတွေကို ဆွဲတဲ့စုတ်တံ တစ်ချောင်းပေးပါ''ဟု ဆိုရာ ဂျူရာက အနားရှိ စုတ်တံများကို ကောက်ယူပြီး ''ဟောဒီထဲက ကြိုက်ရာယူပါ''ဟု ပြောလေသည်။ ထိုအခါ Bellini က ''ဒါတွေမဟုတ်ဘူး။ ခင်ဗျား ဆံပင်ပုံတွေဆွဲတဲ့ အထူးစီမံထားတဲ့ စုတ်တံကိုပြောတာ''ဟု ဆိုလေသည်။ ဂူျရာက သူ့မှာ အထူး စီမံထားတဲ့ စုတ်တံမရှိကြောင်း၊ မယုံလျှင်ဆွဲပြမည်ဟုဆိုကာ ကျပန်းရွေးလိုက်သော စုတ်တံတစ်ချောင်းဖြင့် အလွန်လှပသော ဆံပင်ပုံများကို ဆွဲပြလိုက်လေသည်။ Bellini သည် သူကိုယ်တိုင်မြင်၍သာ ဒါကို ယုံရတော့သည်ဟု ဝန်ခံပြောဆိုခဲ့ပါသည်။

ယခုတင်ပြထားသော ဂျူရာ၏ ကိုယ်တိုင်ရေးပုံတူများကို ကြည့်ပြီး သူ၏ ဆံပင်ဆွဲပုံ ပြောင်မြောက်ပုံကို တွေ့ကြရမည်ဖြစ်ပါသည်။ ထို့ပြင် ပန်းချီကား၏ ထောင့်ဘက်အပေါ်နားတို့တွင် သူ၏ လက်မှတ်နှင့် ရေးဆွဲသော ခုနှစ်ကိုလည်း တွေ့နိုင်ကြပေမည်။ နောက်ဖော်ပြထား သော အံ့ဖွယ်စတုရန်းလေးကိုလည်း Melencollia ကားချပ်တွင် ရှာဖွေတွေ့ရှိနိုင်ပါလိမ့်မည်။

ရနံ့သစ်၊ ၂ဝ၁၁၊ မေလ။