ပန်းချီကား၏လိုက်ဖက်မှု ၈ျူနီယာ၀င်း

ပန်းချီကား၏လိုက်ဖက်မှု

'မနက်ခင်း၊ နေ့လည်နေ့ခင်း၊ ညအိပ်ရာဝင်ချိန် ခရစ်ယာန် ဘုရားရှိခိုးကျောင်းမှ ခေါင်းလောင်းစီးသံများ သို့မဟုတ် ထာဝရ ဘုရား သခင်ကို အောက်မေ့သတိရစွာဖြင့် ကျေးဇူးတင်ဝတ်ပြုဆုတောင်းခြင်း'ဟု အဓိပ္ပာယ်သက်ရောက်သော ‘The Augelus’ အမည်ရှိပန်းချီကား ကို Jean Francois Millet (ရွန် ဖရွန်ဆွားမီလေ) (၁၈၁၄-၁၈၇၅)က ရေးဆွဲခဲ့သည်။ သူသည် ပြင်သစ်ပန်ချီးဆရာတစ်ဦးဖြစ်ကာ နာမည်ကျော် (ဘာဘီဇွန်) School ကျောင်းသား အဖွဲ့ဝင်တွေထဲက ဖွဲ့ဝင်တစ်ဦးလည်းဖြစ်သည်။

Babizon(Barizon) School ဟူသည် ၁၉ ရာစုလောက်က ပြင်သစ်ပန်းချီဆရာများ (Corot. Millet, Daubigny, Rosseau အစရှိသော နာမည်ကျော်များ) စုပေါင်း၍ ၁၈၃ဝ မှ ၁၈ရဝ ကြား ပြင်သစ်နိုင်ငံ ဘာဘီဇွန်အရပ်တွင် ဖွဲ့စည်းခဲ့သော အဖွဲ့တစ်ခု ဖြစ်ပါသည်။ ၄င်းတို့သည် တိရစ္ဆာန်များ၊ တောသဘာဝမြင်ကွင်းကျယ်များ၊ လူများ၊ အရပ်ဒေသများကို ထိုအရပ်တွင် ရေးဆွဲခဲ့ကြသည်။ သူတို့အဖွဲ့သည် စတူဒီယိုအတွင်းမှာထက် အပြင်ထွက်၍ တကယ့်အဖြစ်များကို ခံစားရေးဆွဲသူများဖြစ်သည်။

ထို့ကြောင့်ပင် Millet ရေးဆွဲသောပန်းချီကားများသည် သဘာဝတရားနှင့် စစ်မှန်သော အဖြစ်အပျက်များထဲမှ လှုပ်ရှားများပါဝင်နေ သည်။ Millet ၏ ဖခင်သည် ရိုးရိုးသာမန်လယ်သမားတစ်ဦးဖြစ်သည်။ သူကြီးပြင်းခဲ့ရသော တောဓလေ့ပတ်ဝန်းကျင်ကြောင့် သူ့ပန်းချီကားများတွင် တောင်သူလယ်သမားများ၏ နိစ္စဓူဝအဖြစ်တွေကို တွေ့မြင်ကြရသည်။ သူလျှောက်လှမ်းခဲ့သော ဘဝခရီးလမ်းပေါ်မှ သဘာဝတရားကို ဖော်ဆောင်မှုများအပြင် လယ်ကွင်းထဲမှ တောသူတောင်သားများ၏ ဘဝများ၊ ဆင်းရဲစွာနေထိုင်ရခြင်း၊ ရိုးသားစွာဖြင့် ကျင့်ကြံခြင်းတို့သည် သူ့ပန်းချီကားထဲမှာ နစ်ဝင်လျက် ရှိလေသည်။

Millet သည် ၁၈၃၇ တွင် ပါရီ၌ ပြင်သစ်ပန်းချီဆရာ Paul Delaroche ထံတွင် ၁၂ နှစ်ကြာ ပန်းချီပညာကို သင်ကြားခဲ့သည်။ ထို့နောက် Babizon School နှင့် ဆက်သွယ်၍ အဖွဲ့ဝင်ဖြစ်သွားကာ သဘာဝမြင်ကွင်းကျယ်များကို ရေးဆွဲခဲ့သည်။ ထို့ပြင် လယ်ကွင်းထဲမှ လယ်သမားများ အလုပ်လုပ်ပုံများကို များစွာရေးဆွဲခဲ့ပါသည်။

သူရေးဆွဲသော ပန်းချီကားများတွင် 'နွားနို့ပို့သူမိန်းကလေး' 'ထင်း သယ်လာသူများ' 'သိုးကျောင်းသား' စသည် စသည်ဖြင့် စိတ်ဝင် စားဖွယ် တောဓလေ့၊ တောစရိုက်များ များစွာ စီးဝင်နေသည်ကို တွေ့ရသည်။ တောသဘာဝ ဘာသာသည်ကား Millet ၏ ၁၈၅ဝ အစော ပိုင်းကာလက အဓိကထားသော ဘာသာရပ်ဖြစ်ခဲ့ပါသည်။

၁၈၆၈ ခုနှစ်တွင် သူ၏ ပန်းချီကားများကို စတင်၍ တရားဝင် အသိအမှတ်ပြုခဲ့ရသည်။ ၁၈၆၇ ခုနှစ်တွင် ကျင်းပခဲ့သော ပန်းချီပြပွဲ အတွက် သူ၏ အဓိကကျသော ပန်းချီကား ၉ ချပ် ပြသအပြီးမှာ ထိုသို့ရလဒ်များ ရရှိခဲ့ခြင်းဖြစ်ပါသည်။ Millet ၏ ပန်းချီကားများကို Louvre, Boston ပြတိုက်များတွင် တွေ့ရှိရမည်ဖြစ်ပါသည်။

Millet သည် သာမန်ဘဝ နေရာ ဒေသထဲကနေ ကြီးပြင်းလာပြီး သူ ရေးဆွဲလိုက်သော ပန်းချီများတွင် ရိုးသားမှုနှင့် သာမန်အမြင် များသည် မြင့်မြတ်ကြီးကျယ်မှုကို ဖော်ထုတ်ပြနိုင်စွမ်းရှိသည်ဟု ချီးကူျးခြင်းခံရသူဖြစ်ပါသည်။ Millet ၏ ပန်းချီကားများကို ကြည့်ပြီး 'သူ့ပန်းချီကားတွေဟာ ဒဏ်ရာများထဲမှ မျှော်လင့်ချက်ကို သိမ်းဆည်းပေးထားတယ်။ ဝမ်းနည်းစရာတွေလို့ ခံစားမိနေရာက သနားမှုကို ဖြစ် ပေါ်လာစေတယ်။ စိတ်ကူးတွေပါပဲလို့ အပေါ်ယံတွေးမိနေရာကနေ သဘာဝတရားရဲ့ အစစ်အမှန်တွေပဲလို့ အမှတ်တရ ဖြစ်သွားရပါတယ်' ဟူ၍ သူ့ပန်းချီကားချစ်သူများက မှတ်ချက်ချကြလေသည်။

ထို ‘The Augusekus’ ပန်းချီကားသည် Millet ၏ အကောင်းဆုံး လက်ရာ ၃ ခုတွဲထဲမှ တတိယတစ်ချပ်ဖြစ်သည်။ ပထမ တစ်ကားမှာ (ကောက်ပဲသီးနှံပိုျးများ ကြဲနေသောလယ်သမား) ဖြစ်ပြီး ဒုတိယ တစ်ကားမှာ ‘The Gleaner’ (ကောက်ရိတ်သိမ်းချိန်အပြီး ဆင်းရဲသားအမိုျးသမီးလေးများ သီးနှံများကောက်နေပုံ) ဖြစ်သည်။

နောက်ဆုံးဖြစ်သောကား The Angeluy’ သည် သူ၏ လက်ရာတွေထဲမှာ ပေါ်ပြူလာအဖြစ် ဆုံးဖြစ်သည်။ သဘာဝအတိုင်းပင် ရိုးသားခြင်းနှင့် ဘာသာတရား ရိုသေကိုင်းရှိုင်းခြင်းကို အပြည့်အဝဖော်ဆောင် ထားခြင်း ဖြစ်သည်။ Millet ၏ ဆန္ဒမှာ ထိုပန်းချီကားများကို ကြည့်နေသူတွေ၏ စိတ်ထဲ ဓမ္မတေးသီဆိုချိန်လေးပဲဟု နားလည် လက်ခံပေးမှု၊ ညင်သာ သော ဂီတသံလေးက အလုပ်ကြမ်းလုပ်နေကြသူတွေအား ကျေးဇူးတင်စရာ အနားယူခွင့်လေးပေးချိန်အဖြစ် ခံစားပေးမှုကို ဖြစ်ပေါ်လာစေလို ခြင်း ဖြစ်ပါသည်။

ထို တောင်ယာသမားတို့မှာ အလုပ်တွေ ကောင်းကောင်း လုပ်ကိုင်ခဲ့ကြကာ ၄င်းတို့၏ မျက်စိရှေ့မှာ သီးနှံတွေတောင် လိုရာလို ပုံခဲ့ကြ ပြီး ယခုအချိန်မှာတော့ ဘုရားသခင်ထံမှ ထိုထိုသော လက်ဆောင်များ ရရှိခြင်းအတွက် ဦးခေါင်းများ ညွတ်ကာ ကျေးဇူးတင်စကား ဆိုနေကြ ဟန် ဖြစ်ပါသည်။ အရှည် ၂၅ လက်မ၊ အနံ ၂၁ လက်မရှိသော သေးငယ်သည့် အဲသည်ကင်းဗတ်စ်ပေါ်က ပန်းချီကားတွင် ပန်းချီ ဆရာက တောင်းဆုပြုသူများကို သရုပ်ဖော်ထားပြီး ဆေးရောင်စုံများ ခံနိုင်ရည်ရှိသ၍ ဤခွန်အားရှိသော ဆုတောင်းပို့သမှုက မပြီးဆုံးနိုင်ပါဟူသော ယုံကြည်မှုကို ဆုပ်ကိုင်လျက်ရှိလေသည်။

ထိုပန်းချီကားကို စာရေးဆရာကြီး Thomas Hardy (သောမတ်စ်ဟာဒီ) ၏ Far from the madding crowd အမည်ရှိ ဝတ္ထုရှည်ကြီး မျက်နှာဖုံးမှာ တွေ့ခဲ့ရပါသည်။ Thomas Hardy သည် တောနေ သဘာဝ၊ တောသူတောင်သား၊ လယ်သမားတို့ကြားက အချစ်ဇာတ်လမ်းများကို ရေးဖွဲ့ရာ၌ ထူးခြားပြောင်မြောက်သော စာရေးဆရာတစ်ဦးဖြစ်သည်။ စာဖတ်သူသည် တောနေဓလေ့စရိုက် သဘာဝ အလှသစ်ပင်ပန်းမန်များ၊ ရာသီလိုက်ပွင့်ဖူးသော ပန်းများ၊ သစ်သီးသစ်ဖုများ၊ စိုက်ပိုျးရေးလုပ်ငန်းများ၊ ပြောင်းလဲနေသော ရာသီဥတုများ၊ လယ်သမားတောင်သူများ နေ့စဉ်နေထိုင် အသက်ရှင်နေမှုများ၊ တောင်ယာလုပ်ငန်း လုပ်ကိုင်ကြသူများကြားက သမားရိုးကျ အချစ်ဇာတ်လမ်း တစ်ပုဒ်ကို စိတ်ဝင်စားဖွယ် ဖန်တီးတင်ပြမှုများကို တွေ့မြင်ကြရသည်။

Thomas Hardy ၏ ထူးခြားချက်မှာ သူ၏ အရေးအသားဖြစ်သည်။ သူရေးသားထားသော ဇာတ်လမ်းဝတ္ထုကြီးကို အတိုခုံျးထား သည့် ရေးသားချက်များကို ဖတ်မိလျှင် ဘာမှစိတ်ဝင်စားစရာမရှိဘဲ ငြီးငွေ့စရာပင်ကောင်းသည်။ ထို့ပြင် အတိုခုံျးထားသည်များကို ဖတ်ပြီး မူရင်းကိုပင် ဖတ်ချစ်စိတ် ပျောက်ပျက်သွားနိုင်သည်။ သို့သော် သူ၏ မူရင်းလက်ရာကို ဖတ်ကြည့်မှသာ အင်္ဂလိပ်လူမိုျး စာရေးဆရာတစ်ဦး၏ လက်ရာကောင်းလက်ရာမွန်ကို သိမြင်ခံစားမိကာ စွဲလမ်းနှစ်သက်ဖွယ်ဖြစ်ကြရ၏။ သူရေးဖွဲ့ထားသော တောသူတောင်သားများ၏ သဘာဝကို လှပသော အင်္ဂလိပ်စာ အရေးအသားနှင့် ဒွန်တွဲဖတ်ရသည်မှာ အလွန်အရသာရှိလှ၏။

တောစရိုက်၊ တောသဘာဝများအကြောင်း ပိုင်နိုင်စွာရေးတတ်သော ထိုစာရေးဆရာကြီးတစ်ဦး၏ လက်ရာ ဝတ္ထုကြီးတစ်ပုဒ်၏ မျက်နှာ ဖုံးသည် နာမည်ကျော် တောသဘာဝ ပန်းချီများရေးဆွဲသူ ပန်းချီဆရာကြီး၏ လက်ရာနှင့်သာလျှင် ပနာရကာ တင့်တယ်ပေလိမ့်မည်ဟု Millet ၏ The Angelus ပန်းချီကားကို ကြည့်၍ ခံစားနားလည်လိုက်မိပါတော့သည်။