အမေးအဖြေစွယ်စုံကျမ်း

(အကယ်ဒမစ်ဝီကလီတွင် အပတ်စဉ်ရေးသားနေသော ဂျူနီယာဝင်း ၏ အမေးအဖြေစွယ်စုံကျမ်း များမှ စာဖတ်သူများအတွက် ထုတ်နှူတ်တင်ပြသည်။)

အမေးအဖြေစွယ်စုံကျမ်း 

ဂျူနီယာဝင်း

မြန်မာပြည်က ရာပြည့်ပုဂိုလ်များက ဘယ်သူတွေလဲ

 (ဗိုလ်ချူပ်အောင်ဆန်း၊ ဒေါ်ခင်မျိူးချစ်၊ ဦးခင်မောင်လတ်၊ လူထုဒေါ်အမာ)

၁၉၁၅ခုနှစ်တွင် မွေးဖွားခဲ့ကြသော အထင်ကရပုဂိုလ်ကြီးများကို ၂၀၁၅ ရာပြည့်ပုဂိုလ်များအဖြစ် သတ်မှတ်ပါသည်။ ၁၉၁၅ခုနှစ် ဖေဖော်ဝါရီလ ၁၃ ရက်တွင်မွေးဖွားသော ဗိုလ်ချူပ်အောင်ဆန်း ၁၉၁၅ မေလ ၁ ရက်နေ့တွင် မွေးဖွားသော စာရေးဆ၇ာမကြီး ဒေါ်ခင်မျိူးချစ် ၊ ၁၉၁၅ခုနှစ် သြဂုတ်လ ၂၄ ရက်နေ့တွင် မွေးဖွားသော အင်္ဂလိပ်စာဆရာ၊ အင်္ဂလိပ်စာအက်ဆေးနှင့် အဂ်လ်ိပ်စာ အသုံးအနှူန်း စာအုပ်များရေးသားသူ ဆရာကြီးဦးခင်မောင်လတ် ၊ ၁၉၁၅ခုနှစ် နိုဝင်ဘာလ ၂၉ ရက်နေ့တွင် မွေးဖွားသော စာရေးဆရာမကြီး လူထုဒေါ်အမာ တို့သည် ယခုနှစ် ၂၀၁၅တွင် အသက်ရာပြည့်သည့် အထင်ဂ၇ ပုဂိုလ်များ ဖြစ်ကြပါသည်။

ပထမဦးဆုံးကာတွန်း ဘယ်တုန်းက ရေးဆွဲခဲ့သလဲ

(Richard Outcault, Buster Brown, ကလေးများဝတ်ဆင်သေ ဘတ်စ်တာဘရောင်းစတိုင်နှင့်  ဦးဘကလေးပုံနှင့် သူရေးဆွဲတဲ့ ကာတွန်းတစ်ခု)

ပထမဦးဆုံးရေးဆွဲမူများကို အီတလီနိုင်ငံခေတ်လယ်ပိုင်လောက်က မှန်ကူကွက်ပြူတင်းပေါက်တွေမှာ မြင်ဖူးကြပါသည်။ နောက်ပိုင်းတွင် သတင်းစာများတွင် ပုံများဆွဲလာကြသည်။ ပထမဦးဆုံးကာတွန်းပုံ  ကို ၁၉၀၀ခုနှစ်အစောပိုင်းနှစ်များမှာ ရစ်ချက် အောက်ကော့လ် (Richard Outcault) ကရေးဆွဲခဲ့ပါသည်။ သူတီထွင်ရေးဆွဲသော ဘတ်စ်တာဘရောင်း (Buster Brown) ကာတွန်းပုံသည် ၁၉၀၂ခုနှစ်မှာပေါ်လာသည်။ ဘက်စ်တာဘရောင်းရဲ့ ပုံကို ကလေးများအလွန်သဘောကျကြလိုက်တာမှာ အဲသည် ဘတ်စ်တာဘရောင်း ဆိုတဲ့ပုံလေး ၀တ်တဲ့အတိုင်းလိုက်ဝတ် ကြသည် အထိဖြစ်သည်။ မြန်မာပြည်တွင် ၁၉၁၂ခုနှစ်တွင် ရန်ဂူးတိုင်း (Rangoon Time) အင်္ဂလိပ်သတင်းစာတွင် မျောက် ဟူသော အမည်ဖြင့် ရေးဆွဲသော  ကာတွန်းပုံတစ်ခုပါလာသည်။ ယင်းသည် ပထမဦးဆုံး ကာတွန်းပုံ ဖြစ်လိမ့်မည်။ ၁၉၁၅ခုနှစ်တွင် ကာတွန်း ဦးဘကလေး ရေးဆွဲသော ကာတွန်းပုံတစ်ခုသည် ထိုအင်္ဂလိပ်သတင်းစာတွင်ပါလာသည်။ ယင်းကို အကြောင်းပြု၍ ၂၀၁၅သည် ကာတွန်းနှစ်တစ်ရာ ဖြစ်လာပါသည်။

ပထမဦးဆုံးကာတွန်းစာအုပ် ဘယ်တုန်းက ထွက်လာခဲ့သလဲ

ကျွနိုပ်တို့ တိုင်းပြည်မှာတော့ သည်နှစ် ၂၀၁၅သည် ကာတွန်းနှစ်တစ်ရာပြည့်ပြီ ဖြစ်လေသည်။ နိုင်ငံတကာဖြင့် ကြည့်ပါက ၁၈၉၅ခုနှစ်တွင် ရစ်ချက်ဖယ်လ်တွန် အောက်ကော့စ် (Richard Felton Outcaust) ရေးဆွဲသည့် ကာတွန်းစာအုပ် The Yellow Kid ကပထမဦးဆုံး ထွက်လာတာ ဟုဆိုပါသည်။ 

                                                 (Yellow Kid ကာတွန်းစာအုပ်)

                                                       (Richard Felton Outcaust)

သည်တော့ သူတို့နိုင်ငံမှာ ကာတွန်းနှစ်တရာသည် ၁၉၉၅ခုနှစ်ဖြစ်ပေမည်။ သို့သော် ရှေးခေတ်လူသားများက နံရံတွေမှာ ကာတွန်းရုပ်ပုံတွေ ရေးဆွဲခဲ့တာကနေ စတွက်လိုက်မည်ဆိုပါလျှင် လွန်ခဲ့သော နှစ် ၂သောင်းလောက်ကတည်းက ကာတွန်းတွေ ဆွဲနေပြီဟု ဆိုရပါလိမ့်မည်။ လူတွေက ကာတွန်းများကို ရယ်စရာ ဟာသများဟုပင် ယူဆထားကြပါသည်။ သတင်းစာထဲ မ၈ဇင်းတွေထဲမှာ တစ်မျက်နှာကာတွန်းများကို လူအများက လက်ခံခဲ့ကြကာ ရယ်ဖို့သက်သက်ဟု တွေးကြပါသည်။ မြန်မာပြည်တွင် ကာတွန်းဦးဘကလေး (၁၉၄၅ခုနှစ် အသက်၅၀ကျော်တွင်ကွယ်လွန်ခဲ့ပြီး ဦးရွှေရိုးအကကို တီထွင်ခဲ့သူ)၊ ကာတွန်းဦးဟိန်စွန်း ၊ ကာတွန်း ဦးဗကလေး၊ ကာတွန်းဦးဘဂျမ်း ၊ ကာတွန်းဦးဖေသိန်း တို့သည်ကား မြန်မာပြည်က ကာတွန်းဖခင်ဆရာကြီးများ ဖြစ်သည်ဟု ဆိုရပါလိမ့်မည်။

(ဦးဘကလေး၊ ကာတွန်း ဦးဟိန်စွန်း၊ ကာတွန်းဦးဘဂျမ်း၊ ကာတွန်းဦးဖေသိန်း)

ဂျူနီယာဝင်း

Read More

ဂျူနီယာဝင်း – နာဇီမုန်းတီးရေး ဝါဒဖြန့်ကားတစ်ခု

၁၉၄၀ ခုနှစ်က စာရေးဆရာ Graham Greene ရေးသားခဲ့သော မဂ္ဂဇင်းဝတ္ထုတို “The Lieutenant Died Last” ကို အခြေခံကာ ဝတ္ထုဇာတ်လမ်းနှင့် လွဲချော်ရိုက်ကူးထားသည်ဟု သတ်မှတ်ခံရသော “Went The Day Well?” အမည်ရှိဇာတ်ကား ၁၉၄၂ မှာ ထွက်ပေါ်လာခဲ့ပါတယ်။ ရုပ်ရှင်ကားအစမှာ အင်္ဂလိပ်ပိုင်ရွာကလေး တစ်ရွာရဲ့ သုဿန်တစပြင်မှာ ခရစ်ယာန်ဘုန်းကြီးကျောင်းအစောင့် Mervyn Johns က ကင်မရာဘက်လှည့်ပြီး စကားပြောလိုက်ပါတယ်။ သူရှင်းပြတာကတော့ ဟောသည်ခရစ်ယာန်သင်္ချိုင်းမှာ ဘာကြောင့် ဂျာမန်စစ်သား အလောင်းတွေ မြှုပ်ထားတဲ့ အမှတ်တရကျောက်တုံးတွေ ရှိနေရပါသလဲတဲ့။ သူက “ရှိတာပေါ့ဗျာ…သူတို့က အင်္ဂလန်ကို လိုချင်တာကိုး။ ဒါတွေက သူတို့ရလိုက်တဲ့အရာပေါ့” လို့ သရော်တော်တော် ပြန်ပြောလိုက်ပါတယ်။ အဲဒီကနေ နောက်ကြောင်းပြန်ပါတယ်။

ဒုတိယကမ္ဘာစစ်အတွင်းက အဖြစ်အပျက်တွေဆီ ရောက်သွားတယ်။ အင်္ဂလိပ်လူမျိုးတွေရဲ့ နယ်နိမိတ်ထဲက ရွာကလေးတစ်ရွာဆီကို နာဇီစစ်တပ်တစ်တပ်ရောက်လာပြီး စခန်းချရာက ရွာသားတွေဟာ တန်ဆာခံဖြစ်ပြီး အနှိပ်စက်ခံကြရပုံတွေ တောက်လျှောက်ပြသွားတာပါ။

ဒီကားကို Horror (ထိတ်လန့်တုန်လှုပ်ချောက်ချားဖွယ်) ကားတစ်ကားအဖြစ် သတ်မှတ်ထားပါတယ်။ သည်တော့ တုန်လှုပ်ဖွယ်မြင်ကွင်းများကို မကြိုက်မနှစ်သက်သူများ မကြည့်သင့်ပါ။ စာရေးသူလည်း ကြောက်စရာ Horror ဆိုပြီး လူတွေသတ်ပြနေသောကားများ မကြည့်ပါ။ ကြိုက်လည်းမကြိုက်ပါ။ ဒီကားရဲ့ခေငါးစဉ်က ကဗျာဆန်တာကြောင့်သာ စိတ်ဝင်စားပြီး ဖတ်ကြည့်ဖြစ်ခဲ့တာ ဖြစ်ပါတယ်။ အဲဒီခေါင်းစဉ်လေးအကြောင်း နောက်တော့ဆက်ပြောတာပေါ့။

ရွာသားတွေဟာ ရုတ်တရက် အပိုင်စီးခံလိုက်ရတဲ့အဖြစ်ကို ရင်ဆိုင်ရင်း တော်လှန်ဖို့ကြိုးစားကြပါတယ်။ ရုပ်ရှင်တစ်လုံးဟာ ရက်စက်သောပြကွက်များ လွှမ်းမိုးလျက်ရှိတယ်လို့ဆိုပါတယ်။ ဥပမာ- ပုဆိန်နဲ့ ခုတ်သတ်တဲ့အခန်း၊ အမျိုးသမီးတစ်ဦးက ကလေးတွေအသက်ကယ်ဖုိ့ လက်ပစ်ဗုံးကို သူ့လက်နဲ့ပဲ ဖောက်ခွဲအသက်စွန့်တဲ့ အခန်းများဖြစ်ပါတယ်။ သည်တော့ အင်မတန်မှ စည်းနဲ့ကမ်းနဲ့ ရိုက်ပြတယ်လို့ နာမည်ရှိတဲ့ အင်္ဂလိပ်ကားတစ်ကားမှာ သည်လိုသတ်ပြ၊ ဖြတ်ပြ၊ ခုတ်ပြ၊ ထစ်ပြတဲ့အခန်းတွေပါတာဟာ လွန်ရာကျတယ်လို့ ဝေဖန်ခံရပါတယ်။ နာဇီတွေဟာ သည်အဖြစ်အပျက်တွေမှာထက် ပိုပြီးရက်စက်သူတွေ ဖြစ်ပါတယ်လို့ ဆိုတယ်။ တကယ့်ဘဝစစ်အတွင်းကာလမှာ လူတွေဟာ ဘယ်နှယောက်မှန်းမသိ သေကြ၊ ကြေကြ အသတ်ခံရတာပါ။ အဲသည်ထဲမှာ သူရဲကောင်းဆန်စွာ သေကြတာ၊ သမားရိုးကျသေကြတာ၊ အကြောင်းမရှိအကြောင်းရှာသေကြတာ တစ်ပုံကြီးပါတဲ့။ သည်တော့ အခုသည်ကားက ဒါတွေအားလုံးကို ခြုံပြီး ဒီလောက်တော့ရိုက်ပြသင့်တယ်လို့ သုံးသပ်သူတွေရှိပါတယ်။

Bramely End ဒေသကို နာဇီတွေ ဝင်ရောက်ကျူးကျော် နေထိုင်ရာက ဖြစ်ပျက်ခဲ့တဲ့ ကြောက်လန့်စရာအခန်းများဟာ စစချင်း အေးအေးဆေးဆေး ဝင်လာတဲ့အခန်းနဲ့ များစွာ ဆန့်ကျင်သွားပါတယ်။ ဒီလို ရက်စက်တဲ့အခန်းတွေဟာ  နာဇီစစ်သားတွေအပေါ် ရန်ငြိုးများ ဖြစ်လာစေပါတယ်။ ရွာသားတွေဟာ သူတို့ရွာတော့ နာဇီတွေလက်ထဲ ရောက်သွားပြီဆိုတဲ့အကြောင်း အင်္ဂလိပ်စစ်တပ်ကို အကြောင်းကြားဖို့ ကြိုးစားရင်း အသက်ပေးသွားရတဲ့အဖြစ်များဟာ ဒုတိယကမ္ဘာစစ်ရဲ့ တကယ့်အဖြစ်အပျက်တွေပဲဖြစ်ပါလိမ့် မယ်။

ဒီရုပ်ရှင်ဟာ အမှန်တော့ အင်္ဂလိပ်တွေကို အဓိကထားပြောချင်တဲ့ နာဇီစစ်တပ်သာ ရောက်လာရင် သည်လိုဒုက္ခတွေရောက်ရလိမ့်မယ်လို့ တစ်ဖက်ကနေ အသိပေးတဲ့ ဝါဒဖြန့်ကားတစ်ကားအဖြစ် အစီအစဉ်ချ ရိုက်ကူးထားတယ်လို့ ဆိုပါတယ်။ ၁၉၄၂ ခုနှစ် ဗြိတိသျှပိတ်ကားပေါ် ရုံတင်လိုက်တဲ့အချိန်မှာ စစ်ကမပြီးသေးပါ ဘူး။ သည်တော့ ဂျာမန်တွေစစ်ရှုံးသွားမှာလားဆိုတာလည်း ဘယ်သူမှမသိပါဘူး။ သို့သော် သည်ရုပ်ရှင်ကား ကြောင့် အင်္ဂလိပ်ဟာ နာဇီဂျာမနီကို တော်လှန်မှဖြစ်မယ်ဆိုတဲ့ အသိစိတ်တွေဝင်လာကောင်း ဝင်လာမှာဖြစ် ပါတယ်။

ရုပ်ရှင်ကားအမည် “Went the day well?”ဟာ ပထမကမ္ဘာစစ်အတွင်းက အမည်မသိ အင်္ဂလိပ်ကဗျာဆရာတစ်ယောက်ရဲ့ ကဗျာခေါင်းစဉ်တစ်ခုဖြစ်ပါတယ်။ အဲဒီခေါင်းစဉ်ကို စစ်အတွင်းမှာ သေဆုံးသွားတဲ့လူစာရင်း သတင်းစာတွေထဲ ထည့်တဲ့အခါ ယူသုံးကြပါတယ်။ အဓိပ္ပါယ်က “နေ့ရက်တွေက ကောင်းကောင်းမွန်မွန် ခရီးဆက်နေကြပါရဲ့လား” ။ သေဆုံးသူတွေအတွက်တော့ မသိနိုင်တော့ပါဘူး။ “ကျွန်ုပ်တို့က သေဆုံးသွားပြီမို့ နေ့ရက်တွေက ဆက်လက်ပြီး ကောင်းကောင်းခရီးဆက်နေကြသလား ဆိုတာ ဘယ်တော့မှ မသိနိုင်တော့ပါဘူး။ သို့သော်လည်း… ကောင်းကောင်း မကောင်းကောင်း…လွတ်လပ်ရေး အတွက်…ငါတို့ အသက်တွေ ပေးခဲ့ကြတယ်” လို့ ကဗျာက ဆိုလိုထားတာပါ။

ရုပ်ရှင်ဟာ ရုံပေါ်ကို တစ်နှစ်ကျော်နောက်ကျပြီးမှ တင်နိုင်ခဲ့ပါတယ်။ ရုပ်ရှင်ထဲမှာ ရိုက်ပြထားတဲ့ ကြောက်ရွံ့ထိတ်လန့်ဖွယ်အခန်းများဟာ မျှော်လင့်မထားဘဲ ထွက်ပေါ်လာတာမျိုး ဖြစ်နေလို့ဆိုပါတယ်။ အဲဒီမျက်စိမှိတ်ထားရမယ့် အခန်းတွေကိုကြည့်ရဖို့ ကြိုတင်ပြင်ဆင်နိုင်မှုမရှိဘဲ ရုတ်တရက် စိတ်လှုပ်ရှားစရာ တွေဖြစ်နိုင်တယ်လို့ ကောက်ချက်ချပါတယ်။

ရုံတင်လိုက်တဲ့အချိန်မှာ ပရိသတ်ရဲ့တုံ့ပြန်မှုဟာ ဒါရိုက်တာမျှော် လင့်ထားတဲ့အတိုင်း ရခဲ့ပါတယ်။ နာဇီတွေကို မုန်းတီးမှု၊ တော်လှန်လိုမှုတွေ စိတ်ပိုင်းဆိုင်ရာမှာ ဖြစ်ပေါ်လာ ပါတယ်။ ဒါရိုက်တာကတော့ သူဖြစ်စေလို့တဲ့ နောက်ထပ်အမြင်တစ်ခုကို အခုလို ဆိုခဲ့ပါတယ်။ “ လူတွေရဲ့ ယဉ်ကျေးသိမ်မွေ့ပါတယ် ဆိုတဲ့ အမူအယာတွေ၊ အမူအကျင့်တွေဟာ… စစ်ဆိုတဲ့အရာနဲ့လည်း ထိတွေ့လိုက် ရော… လုံးဝ ဥသုံကြမ်းတမ်းတဲ့သတ္တဝါတွေအဖြစ် ပြောင်းလဲကုန်ပါတယ်။ ဒါဟာ ကျွန်တော်ပြောချင်တဲ့ ရုပ်ရှင်ထဲမှာ ရိုက်ပြခဲ့တဲ့ပြကွက်တွေပဲ ဖြစ်ပါတယ်”

ပရိသတ်က သူတို့အတွက် ဖျော်ဖြေရေးဆိုတဲ့ ရုပ်ရှင်ကားတစ်ကားကို  တကယ့်အဖြစ်အပျက်နဲ့ ချိန်ထိုးပြီး ရောယှက်ကြည့်ခွင့်ရခဲ့တယ်။ ဝါဒဖြန့်ကားတစ်ကားဖြစ်ပေမယ့် ဒါရိုက်တာရဲ့ တင်ပြမှုကြောင့် ပရိသတ်ရဲ့ရင်ထဲမှာ နာဇီကိုမုန်းတီးရွံရှာသွားတယ်ဆိုတာဟာ ဒီကားရဲ့အောင်မြင်မှုပဲဖြစ်တယ်လို့ သုံးသပ်ရမှာဖြစ်ပါတယ်။

Read More

ဆရာကြီးဦးသက်ထွန်းသုို့အမှတ်တရ ဂျူနီယာဝင်း

(ဆရာကြီးဦးသက်ထွန်း အမှတ်တရစာအုပ်)

ပြင်သစ်နိုင်ငံဆုိုင်ရာ မြန်မာသံအမတ်ကြီး ဦးသက်ထွန်း၊ ဆွစ်ဇာလန်နုိုင်ငံ စပိန်နုိုင်ငံဆုိုင်ရာ မြန်မာ သံအမတ်ကြီး ဦးသက်ထွန်း ဟူသော ဆရာကြီးဦးသက်ထွန်းကုို ကျွန်မစတင်သိကျွမ်း ခင်မင်ခွင့်ရခဲ့ချိန်မှာ ဆရာကြီး ဒါရုိုက်တာအဖြစ် ထွန်းဖောင်ဒေးရှင်းဘဏ်တွင် တာဝန်ယူစဉ်က ဖြစ်ပါသည်။ အချိန်ကာလအားဖြင့် ၂၀၀၈ ခုနှစ်လောက်မှာ ဖြစ်ပါသည်။

(ဆရာကြီးဦးသက်ထွန်းနှင့် ၂၀၀၈ခုနှစ် တုန်းက အမှတ်တရ နောက်တွင် ရပ်နေသူမှာ ကျွန်မ၏ဖခင် ဒေါက်တာခင်မောင်ဝင်း)
(ထိုဓါတ်ပုံမှာ ဆရာကြီး ဦးသော်ကောင်းက ရိုက်ပေးခဲ့တာ ဖြစ်ပါသည်။)

ကျွန်မဘာသာပြန်ရေးသားခဲ့သော Lewis Carroll ‘s Alice in Wonderland ကုို “အဲလစ်နှင့် အံ့ဖွယ်ကမ္ဘာ“ စာအုပ်လေးအား ထွန်းဖောင်ဒေးရှင်းမှ ၂၀၀၈ ခုနှစ်အတွက်ကလေးစာပေ ဆုချီးမြင့် ခဲ့သည်ဟု ကြားသိခဲ့ရစဉ်တွင် ကျွန်မတုို့ မိသားစုအတွက် ဆရာကြီးဦးသက်ထွန်း နှင့်ရင်းနှီးခွင့်ရဖုို့ အခွင့်အရေး ရခဲ့သည်ဟု ဆုိုရပါလိမ့်မည်။ ဆရာကြီးနေထုိုင်သော လမ်းသွယ်သည် ကျွှန်မတုို့ အိမ်နှင့် တလမ်းသာခြားပါသည်။ ထုိုဆုရသော “အဲလစ်နှင့်အံ့ဖွယ်ကမ္ဘာ“ စာအုပ်ကုို ဆ၇ာကြီးက လက်မှတ်ထိုး၍ လာပို့ပေးစေလိုကြောင်းဆိုသဖြင့် ဆရာကြီး အိမ်ကုို ပထမဦးဆုံးရောက်ဖူး ခဲ့ပါသည်။ ကျွန်မသည် သံအမတ်ကြီးဦးသက်ထွန်း ဟူသော ဂုဏ်ပုဒ်ကြီးကြောင့် တွေ့ဆုံရမည့်အရေး အလွန်ပဲ ကြောက်ခဲ့မိသည်။ ဆရာကြီး၏ အိမ်ကလေးသည် သစ်ရိပ်ပင်ရိပ်ဖြင့် သာသာယာယာ အေးချမ်းလှသောကြောင့် ကျွန်မစိတ်ထဲက စုိုးရိမ်မူများ များစွာသက်သာ ရာရခဲ့ပါသည်။ (သြော်…. မြို့ကြီးပြကြီး ထဲက အေးချမ်းတဲ့ အရိပ်အာဝါသဟာ လူ့ရဲ့စိတ်ကုို ပြောင်းလဲစေသတဲ့လား။)

ဆ၇ာကြီးဦးသက်ထွန်းသည်ကျွန်မပေးသော စာအုပ်လေးကုို လက်ခံယူရင်း ဆုရရှိသူတစ်ဦး ဖြစ်တာကြောင့် ဆက်လက် လုပ်ဆောင်စရာများစွာ ရှိသေးကြောင်း ရှင်းပြပါသည်။ ဆရာကြီးကုို တွေ့မြင်ရသည်မှာ မာန်မာနမရှိပဲ၊ ကျွန်မလုို ဘာမဟုတ်သည့် သူတစ်ယောက်အပေါ် ယခုလုို နွေးနွေးထွေးထွေး စကားပြောတာ၊ တရင်းတနှီး ရှိနေတာကုို ကျွန်မအတွက် ဂုဏ်ယူစရာ ဖြစ်ရပါသည်။ ဆရာကြီးနှင့်စကားပြော နေရင်း ကျွန်မအဘုို ဘဘကြီးဦးခင်မောင်လတ် ကုို မြင်ယောင်နေမိပါသည်။ (ဘဘကြီးလဲ အဲသည်လုိုပဲ။ သူ့တပည့်တပန်းတွေနဲ့ စကားပြောရင် ရင်းရင်းနှီးနှီး ချစ်ချစ်ခင်ခင် ရှိတယ်။) နောက်ပိုင်းမှာ ဆရာကြီးနှင့် တွေ့ဆုံဖုို့ အခွင့် အလန်းများကြုံလာတုိုင်း အနားကပ်ဖုို့ ကြောက်မိသောလည်း ဆရာကြီးအနားသွားကာ ဂရုတစုိုက် နှူတ်ဆက်ဖြစ်ခဲ့ပါသည်။ ကျွန်မတို့က ဆရာကြီးနှင့် နှူတ်ဆက် စကားသွားပြောတုိုင်း ၀မ်းသာအားရ လက်ခံ ပြန်ပြောပါသည်။

ကျွန်မက ထွန်းဖောင်ဒေးရှင်းကပေးသော ကလေးစာပေဆုရသဖြင့် ကျွန်မ၏ မိတ်ဆွေများကုို ဖိတ်ကာ အိမ်မှာ ကြက်ဆီထမင်း ၀ယ်ကြွေးဖြစ်ပါသည်။ ဆရာကြီးလုို ဧရာမ ပုဂ္ဂိလ်ကြီးကုို အ်ိမ်သုို့ မဖိတ်ဝံ့ပါ။ ထုိုနေ့က ဆရာကြီးထံ ကြက်ဆီထမင်းထုတ်များ ကိုင်ကာ ကိုယ်တိုင်သွားပုို့ ဖြစ်ပါသည်။ ကျွန်မမှတ်မိနေတာက အဲသည်နေ့က ဆရာကြီးနှင့်အတူ ဧည့်သည်တစ်ယောက် ရှိနေပါသည်။ ကျွန်မသည် ဆုရလုို့ကျွေးတာပါဟု စကားဆုိုရင်း စကားပြော နေတာ အနှောက်အယှက် ဖြစ်မှာ စုိုးသဖြင့် ချက်ချင်းပြန်ဖုို့ ထရပါသည်။ ဆရာကြီးသည် ပြုံးကာ နှူတ်ဆက်ရင် နှင့် “အတော်ပဲ - ဧည့်သည်ကုို ပါ ကြက်ဆီထမင်း ကျွေးတာပေါ့“ ဟုပြောလုိုက်တာ ကျွန်န်မ အခုထိ အမှတ်ရနေပါသည်။ (ဆရာကြီး နှင့်တွေ့ရလေ၊ ကျွန်မအဘုိုး ကုိုပိုပြီးသတိရလေပါပဲ။)

ဆရာကြီးကွယ်လွန်သွားပြီဟု သတင်းကြားချိန်မှာ ကျွန်မအဘုိုးနှင့် တူတဲ့သူတစ်ဦး အဖြစ်လေးစား ချစ်ခင်ရသူသည် လောကကြီးထဲ မရှိတော့ ပါလားဟု များစွာ ၀မ်းနည်း စိတ်မကောင်း ဖြစ်ရပါသည်။ အခုတော့ ဆရာကြီး ကွယ်လွန်သွားခဲ့တာ သုံးနှစ်တောင်ရှိပါပီ။ သံအမတ်ကြီးတစ်ဦး၏ အမှတ်တရ စာအုပ်တစ်အုပ်မှာ ကျွန်မလို ဘာမဟုတ်တဲ့ သူတစ်ယောက်က အခုလုို ရေးခွင့်ကြုံကာ ရေးခွင့် ပေးခံရတာကုို ကျွန်မမှာ မတန်မရာ နေရာရသလုိုပင် ခံစားနေမိပါသည်။ စိတ်သဘောထား အေးချမ်းသော၊ နွေးထွေးသော ဆရာကြီး အတွက် အမှတ်တရစကားဆုိုရင်းနှင့် ဆရာကြီး၏ စာဖတ်ပရိသတ်တစ်ဦးအနေဖြင့် ခင်မင်လေးစားရသူ စာပေပညာရှင်ကြီးတစ်ဦးအား သတိတရရှိနေဆဲ ရှိပါကြောင်းဖြင့်…….။

Read More